Wednesday, August 31, 2016

കോട്ടിയമ്പലം - കഥ

'കൊട്ടിയമ്പലം'* - കഥ

ആ യുവാവ് ഓടുകയായിരുന്നു. കാപാലികർ അയാളുടെ രക്തത്തിന് വേണ്ടി പുറകേ പായുന്നുണ്ടായിരുന്നു.

രാജവീഥിയിൽ ആബാലവൃദ്ധം ജനങ്ങൾ അയാളുടെ രക്ഷയ്ക്കായി തടിച്ചുകൂടി. അവർക്ക് അറിയാമായിരുന്നു ആ യുവാവ് ഭാവിയുടെ വാഗ്ദാനമാണെന്ന്.

വ്യാജ തെളിവുകളുമായാണ് കാപാലികർ ആ യുവാവിന്റെ പുറകേ പായുന്നത്!

ജനസഹസ്രങ്ങൾ ഉച്ചത്തിൽ വിളിച്ചു പറഞ്ഞു. “ആ ഉദ്യാനത്തിലേക്ക് കയറൂ! ഉദ്യാന ഉടമസ്ഥൻ നീതിമാനാണ്! താങ്കളെ രക്ഷിക്കും!

യുവാവ് വേഗത്തിൽ ഉദ്യാന കവാടത്തിലൂടെ വൃക്ഷത്തണലിൽ ഉപവിഷ്ടനായിരുന്ന നീതിമാന്റെ മുന്നിലെത്തി!

ഉദ്യാനപാലകന്മാർ ആ യുവാവിന്റെ നേരെ ആക്രോശിച്ചു. “നീ കുറ്റവാളിയാണെന്ന് ഞങ്ങൾ തീരുമാനിച്ചു കഴിഞ്ഞു. 1948 ജനുവരി 30-ന് ഞങ്ങൾ ശിക്ഷ വിധിച്ച ഒരാളെ ഞങ്ങൾ തന്നെ യമപുരിക്കയച്ചിട്ടുണ്ട്”.

ഉദ്യാനപാലകർ ആ യുവാവിനെ വളഞ്ഞിട്ട് മർദ്ദിച്ചു! കുതറിയോടിയ യുവാവ് വീണ്ടു രാജവീഥിയിലെത്തി!

ജനസഹസ്രങ്ങൾ ഒരേ സ്വരത്തിൽ പറഞ്ഞു “ആ കൊട്ടാരത്തിലേയ്ക്ക് കയറു! അവിടെ നിനക്ക് നീതി ലഭിക്കും”.

പാഞ്ഞടുക്കുന്ന കാപാലികരെ പിന്തള്ളി ആ യുവാവ് കൊട്ടാരകാരണവന്മാരുടെ മുന്നിലെത്തി!

“എന്നെ രക്ഷിക്കണം ഞാൻ തെറ്റൊന്നും ചെയ്തിട്ടില്ല! ശരി മാത്രമേ ചെയ്തിട്ടുള്ളൂ” “എന്നെ വധിക്കാൻ കാപാലികർ പുറത്ത് കാത്ത് നിൽക്കുന്നു”

“നീ ആരാ?” കാരണവന്മാർ ചോദിച്ചു.

“സർ ഞാൻ ഗ്രാമവാസിയാണ്. നഗരത്തിൽ പഠിക്കാൻ വന്നതാണ്” യുവാവ് ബഹുമാനപൂർവ്വം പറഞ്ഞു.

“ഓ! നീ ധിക്കാരിയാണല്ലേ? പഠനം നിന്നെ വഷളാക്കിയല്ലേ?”

“എന്താ സർ, അങ്ങനെ പറയാൻ” യുവാവ് ആരാഞ്ഞു

“ യജമാൻ എന്ന് വിളിക്കാതെ നീ എന്തിനാ ഞങ്ങളെ സർ എന്ന് വിളിക്കുന്നത്” കാരണവർ കോധത്തോടെ ചോദിച്ചു

“എന്നെ രക്ഷിക്കണം. അവർ എന്നെ കൊല്ലും” യുവാവ് അപേക്ഷിച്ചു.

“ആട്ടെ. നീ പ്രധാന വാതിലുടെ അല്ലേ ഇവിടെ പ്രവേശിച്ചത്.  ‘ കൊട്ടിയമ്പലം’ വഴി പ്രവേശിക്കൂ! അപ്പോൾ മാത്രമേ നിന്റെ അപേക്ഷ പരിഗണിയ്ക്കാനാകൂ” കാരണവന്മാർ  കല്പിച്ചു.

കിങ്കരന്മാർ ആ യുവാവിനെ കാരാഗ്രഹത്തിലേയ്ക്ക് കൊണ്ടുപോയി. രാജവീഥിയിൽ അണിനിരന്ന ജനസാമാന്യം ആ യുവാവിന്റെ ജീവന് വേണ്ടി പ്രാർത്ഥിച്ചു.
----------------------------------------

* കൊട്ടിയമ്പലം - പഴയ നാല് കെട്ടുകളിൽ പുറകുവശത്തുള്ള പ്രവേശന കവാടം. അധസ്ഥിതർക്ക് പ്രവേശിക്കാനുള്ളത്.

Tuesday, August 30, 2016

ധൈഷ്ണിക വ്യാപാരികൾ

2014 -  ചിലരുടെ ഗാന്ധി നിന്ദ  എന്ന ധൈഷണിക (?) വ്യാപാരം അരങ്ങു തകർക്കുന്നു. മറ്റു ചിലരുടെ passion സെക്രട്ടേറിയറ്റ് ജീവനക്കാരെ 'പത്ത് പറയുക' എന്നതാണ്. 1869-ലാണ് ഗാന്ധിജി ജനിച്ചതും സെക്രട്ടേറിയറ്റ് മന്ദിരത്തിന്റെ നിർമാണം പൂർത്തീകരിച്ചതും. അതാണോ ഈ ആകസ്മിക 'ബൂജി' അപസ്മാരബാധയ്ക്ക് കാരണം.  ഭരിക്കുന്നവരും ഭരിച്ചിരുന്നവരും, ആൾ ദൈവങ്ങളുടെ മുന്നിൽ സാഷ്ടംഗപ്രണാമം നടത്തുന്ന ഉന്നത കാര്യക്കാർ വരെ `അഹമഹമികയാ  സെക്രട്ടേറിയറ്റ് ജീവനക്കാർക്കെതിരെ ശാപവാക്കുകൾ ചൊരിഞ്ഞുകൊണ്ട്‌, ചൊറിഞ്ഞുകൊണ്ട്, അനുഭവസാക്ഷ്യങ്ങൾ നിരത്തുന്നു! ജനോപകാരപ്രദമായ നയരൂപീകരണത്തിനും, ഭരണ നിർവ്വഹണത്തിനും തടസ്സമായ എന്തെങ്കിലും പ്രവണതകൾ സെക്രട്ടേറിയറ്റ് സംവിധാനത്തിൽ ഉണ്ടെങ്കിൽ അത് പരിഹരിക്കുന്നതിനുള്ള ക്രിയാത്മക നിർദ്ദേശങ്ങൾ  ഇവരുടെ ലേഖന പരമ്പരകളിൽ വിരളമാണ്. സെക്രട്ടേറിയറ്റ് ജീവനക്കാരെയും, മറ്റ് ഇതര ജനവിഭാഗങ്ങളെയും തമ്മിലടിപ്പിക്കുന്ന നൈപുണ്യരാഹിത്യമാണ് ഭരിച്ചിരുന്നവരിലും, ഭരിക്കുന്നവരിലും, ഉന്നത കര്യസ്ഥരിലും തെളിഞ്ഞുകാണുന്നത്.  ഹിന്ദുക്കുഷ് പർവ്വതനിര കടന്നെത്തിയ അധിനിവേശക്കാരാണോ സെക്രട്ടേറിയറ്റ് ജീവനക്കാർ? സാധാരണക്കാരുടെ - കർഷകരുടെ, കർഷകതൊഴിലാളികളുടെ, പരമ്പരാഗത തൊഴിലാളികളുടെ, ഇടത്തരം കച്ചവടക്കാരുടെ, വ്യാവസായിക തൊഴിലാളികളുടെ, സർക്കാർ ജീവനക്കാരുടെ - കുടുംബങ്ങളിൽ നിന്ന് യോഗ്യത നേടി, സേവന വേതന വ്യവസ്ഥകളുടെ ആകർഷണം കാരണം, PSC നടത്തുന്ന മത്സര പരീക്ഷ ജയിച്ച് സെക്രട്ടേറിയേറ്റിലേയ്ക്ക് കടന്നുവന്നവരല്ലേ? പെരുമാറ്റച്ചട്ട ങ്ങളാൽ ബന്ധനസ്ഥരായ സെക്രട്ടേറിയറ്റ് ജീവനക്കാരെ കെട്ടിയിട്ട് തല്ലുകയാണ്. (ക്ഷമിക്കണം 'കെട്ടിയിട്ട് തല്ലുക' എന്ന പ്രയോഗത്തിന് ഒരു മന്ത്രിയോട്  കടപ്പാടുണ്ട്!). ഒരു വിഭാഗത്തിനെതിരെ മറ്റൊരു ജനവിഭാഗത്തെ ഇളക്കിവിടുന്നത് ഇടതുപക്ഷ രാഷ്ട്രീയമല്ല. ബൂർഷ്വാ രാഷ്ട്രീയംപോലുമല്ല. എല്ലാം തികഞ്ഞ 'തങ്കകട്ടികൾ' അല്ല  സെക്രട്ടേറിയറ്റ് ജീവനക്കാർ എല്ലാവരും. Whistle-blowers-ന് പൂർണ നിയമ സംരക്ഷണം നൽകിയാൽ 90% സെക്രട്ടേറിയറ്റ് ജീവനക്കാരും Whistle-blowers ആകും എന്നുറപ്പാണ്. കാരണം അവർക്ക് ഒരുപാട്  കഥകളറിയാം.

  FB post-ൽ നിന്ന്